පවිත්ර උපදෙස, ඵලදායී ප්රතිඵලය
ඉමාම් බුහාරි (රහිමහුල්ලාහ්) තුමා සිය ‘සහීහුල් බුහාරි’ හදීස් ග්‍රන්ථය සම්පාදනය කිරීමට හේතුව ඔබගෙන් ඇතැම් අය දන්නවා විය හැක.
මේ පිළිබඳව ඉමාම් බුහාරි (රහිමහුල්ලාහ්) තුමා මෙසේ පවසයි:
‘අපි ඉස්හාක් ඉබ්නු රාහවයිහි (රහිමහුල්ලාහ්) තුමා ළඟ සිටින විට, “නබි (සල්ලල්ලාහු අලෙයිහි වසල්ලම්) තුමාණන්ගේ සහීහ් (සත්‍ය) සුන්නාවන් සංක්ෂිප්තව ගොනු කළ ග්‍රන්ථයක් ඔබ සකස් කරන්නේ නම් කොපමණ හොඳද!” යැයි එතුමා පැවසූහ.
මේ පිළිබඳව ඉමාම් බුහාරි (රහිමහුල්ලාහ්) වැඩිදුරටත් මෙසේ පවසයි:
‘මෙම වචන මාගේ හදවතට දැඩි බලපෑමක් ඇති කළේය. ඉන්පසු මම ‘අල්-ජාමිඋස් සහීහ්’ ග්‍රන්ථය සම්පාදනය කිරීමට පටන් ගතිමි.’
ඉතාමත් විශ්වාසදායක හදීස් ඉමාම් බුහාරි (රහිමහුල්ලාහ්) තුමා සිය ග්‍රන්ථයට ඇතුළත් කළේය.
ඉමාම් ඉස්හාක් තුමාගේ පවිත්ර උපදෙස සහ ඉමාම් බුහාරි තුමාගේ පවිත්ර ආරම්භය යන දෙකම හේතුවෙන්, සහීහුල් බුහාරි ග්‍රන්ථය අල්-කුර්ආනයට පසුව ඇති උතුම්ම ග්‍රන්ථය බවට අල්ලාහ් පත් කළේය. එය කොතරම් විශාල භාග්‍යයක්ද!
ජනතාව කෙරෙහි යහපත් චේතනාවෙන් පසුවිය යුතුය
ඉමාම් අල්-ගස්සාලි (රහිමහුල්ලාහ්) තුමා මෙසේ පවසයි:
‘නරක සිතුවිලි (سوء الظن) ඇති කරගැනීම, නරක වචන කතා කිරීම මෙන්ම තහනම් කරනු ලැබ ඇත. අන් අයගේ අඩුපාඩු ඔබේ මුවින් තවත් අයෙකුට පැවසීම ඔබට තහනම් කර ඇතිවාක් මෙන්ම, ඔබේ හදවතින් ඔබේ සහෝදරයා ගැන නරක සිතුවිල්ලක් ඇති කරගැනීම ද ඔබට අනුමත නැත.’
තවද එතුමා මෙසේ පවසයි: ‘නරක සිතුවිලි ඇති කරගැනීම තහනම් වීමට හේතුව, හදවත්හි ඇති රහස් හොඳින්ම දන්නේ අල්ලාහ් පමණක් වන බැවිනි. එම නිසා, අන් අය ගැන නරක සිතුවිලි ඇති කරගැනීමට ඔබට අයිතියක් නැත. යම් කරුණක් වෙනත් කිසිදු පැහැදිලි කිරීමකට ඉඩක් නැති තරමට ඔබට පැහැදිලිවම පෙනෙන තෙක්, අයෙකු ගැන නරක සිතුවිල්ලක් ඇති කර නොගත යුතුය.
එවැනි දෙයක් ඔබට සෘජුවම පැහැදිලිව දැනගන්නට ලැබුණහොත්, ඔබ දැනගත් දෙය සහ ඇසින් දුටු දෙය විශ්වාස නොකර සිටිය නොහැක. නමුත්, ඔබ ඔබේ ඇසින් නොදුටු, ඔබේ කනින් නොඇසූ දෙයක් ඔබේ හදවතේ ඇතිවන්නේ නම්, එය නියත වශයෙන්ම ෂෙයිතාන් ඔබ තුළ ඇති කළ සිතුවිල්ලකි. එම නිසා, එම සිතුවිල්ල අසත්‍යයක් ලෙස බැහැර කළ යුතුය.’
සදකා
දන් දීම (සදකා) අල්ලාහ්ගේ ආදරය සහ තෘප්තිය ලැබීමටත්, මහෂර් දිනයේදී ලැබෙන සෙවණ, නිරයෙන් මිදීමටත්, රෝග සුව වීමටත්, ධනයෙහි ආශිර්වාදය (බරකාත්) සහ තවත් බොහෝ යහපත් දේ ලබා ගැනීමටත් ප්‍රමාණවත් වේ.
