பரகத் நிறைந்த வாழ்வு – சில வழிகாட்டல்கள் என்ற தொடர் உரை நிகழ்ச்சியின் 3வது நிகழ்ச்சியாக ‘வாழ்வாதாரத்தின் (ரிஸ்கின்) திறவுகோல்கள்’ என்ற தலைப்பில் அஷ்ஷெய்க் ரியாஸ் லதீஃப் அவர்கள் 11-05-2026 தினத்தில் நிகழ்த்திய உரையின் சுருக்கம்…
வாழ்வாதாரத்தின் (ரிஸ்கின்) திறவுகோல்கள்
மனநிறைவும் வாழ்வாதாரமும்: இஸ்லாமியப் பார்வையில் ஒரு தேடல்
எல்லா மனிதர்களும் தங்கள் வாழ்வில் எதிர்பார்ப்பது ஒரு வளமான மற்றும் நிம்மதியான வாழ்வாதாரத்தை (ரிஸ்க்) தான். இந்த உலக வாழ்க்கையில் மனிதர்களின் கடுமையான உழைப்பும், அன்றாடப் போராட்டங்களும் எதனை மையமாகக் கொண்டுள்ளன என்று பார்த்தால், அது தானும் தன்னைச் சார்ந்தவர்களும் பட்டினியின்றி வாழ வேண்டும் என்பதற்காகவே அமைகிறது.
உழைப்பின் நோக்கம் யாது?
ஒரு குழந்தை வளர்ந்து பல்கலைக்கழகம் சென்று வெளியேற ஏறக்குறைய 24 ஆண்டுகள் ஆகின்றன. வாழ்வின் ஒரு பெரும் பகுதியை நாம் கல்விக்காகச் செலவிடுகிறோம். இந்த நீண்ட காலத் தேடலின் பின்னணியில் இருப்பது, “எப்படி வருமானத்தை ஈட்டுவது? எவ்வாறு ஒரு வசதியான வாழ்க்கையை அமைத்துக் கொள்வது?” என்ற இலக்குதான். நல்ல வருமானம், அழகான வீடு, சொத்துக்கள், வாகனங்கள் எனப் பட்டியலிட்டுக் கொண்டே போகலாம். ஆனால், இந்த ஆசைகள் அதிகரிக்க அதிகரிக்க, மனிதன் ஒருவித மன உளைச்சலுக்கும், நிம்மதியற்ற ஓட்டத்திற்கும் தள்ளப்படுகிறான்.
இறைவனுடனான தொடர்பு இல்லாமலும், மார்க்க வழிகாட்டல்களைப் புறக்கணித்தும் ஒருவன் செல்வத்தைத் தேடும்போது, அவனது வாழ்க்கை அர்த்தமற்றதாகி விடுகின்றது.
உண்மையான செல்வந்தன் யார்?
செல்வம் என்பது நம்மிடம் இருக்கும் பொருள்களை வைத்து அளவிடப்படுவதல்ல.
நபி (ஸல்) அவர்கள் கூறினார்கள்: “அல்லாஹ் உனக்கு விதித்ததைக் கொண்டு நீ திருப்தியடைந்து கொள்; மனிதர்களிலேயே நீதான் மிகப்பெரிய செல்வந்தனாக இருப்பாய்.”
உள்ளத்தின் போதுமென்ற தன்மையே (கனாஅத்) ஒரு மனிதனை வெற்றியாளனாக்குகிறது. எவ்வளவுதான் வருமானம் கூடினாலும், “இன்னும் வேண்டும்” என்ற பேராசை மனிதனிடம் இருந்து கொண்டே இருக்கும். இந்தத் பேராசை நரகத்தின் தன்மையைப் போன்றது. 50 ஆயிரம் சம்பாதிப்பவன் ஒரு லட்சத்தை எதிர்பார்ப்பான்; ஒரு லட்சத்தை அடைந்தவன் ஒன்றரை லட்சத்தை நோக்கியே ஓடுவான். இந்த ஓட்டத்தில் ஒருபோதும் அவனுக்குத் திருப்தி கிடைப்பதில்லை.
வாழ்வாதாரத்தில் பரக்கத் (அபிவிருத்தி) ஏற்பட வழிகள்
நமது வருமானத்தில் நிம்மதியும், பரக்கத்தும் ஏற்பட இஸ்லாம் சில ஆன்மீக வழிகளைக் காட்டுகின்றது. அவற்றை வெறும் பொருளாதாரத் தேவைகளுக்காகச் செய்யாமல், இறைப் பொருத்தத்திற்காகச் செய்யும்போது அதன் பலன்கள் இரட்டிப்பாகும்:
இறை அச்சம் (தக்வா): யார் அல்லாஹ்வை அஞ்சி நடக்கிறாரோ, அவருக்கு அவன் எதிர்பாராத வழிகளில் இருந்து வாழ்வாதாரத்தை வழங்குகிறான். சோதனைகள் வரும்போது இறைவனை நெருங்குவது நம்மைப் பலப்படுத்தும்.
பாவமன்னிப்பு (இஸ்திஃபார்): ஒரு மனிதன் அதிகமாகப் பாவமன்னிப்புத் தேடும்போது, அல்லாஹ் வானத்திலிருந்து மழையைப் பொழிவித்து, அவனது செல்வத்தையும் சந்ததிகளையும் பெருக்குவதாக குர்ஆன் (சூரா நூஹ்) வாக்களிக்கிறது.
குடும்ப உறவுகளைப் பேணுதல் (ஸிலதுர் ரஹ்ம்): தனது வாழ்நாளில் நீண்ட ஆயுளையும், வாழ்வாதாரத்தில் விஸ்தீரணத்தையும் விரும்புபவர், தனது உறவினர்களுடன் இணக்கமாகச் செயல்பட வேண்டும். பெற்றோரைப் பேணுவதும், உறவினர்களுக்கு உதவுவதும் செல்வத்தை அதிகரிக்கும் திறவுகோல்கள்.
இறைவழியில் செலவழித்தல் (இன்பாக்): ஒவ்வொரு நாளும் இரு மலக்குகள் இறங்குகிறார்கள். அதில் ஒருவர், “இறைவா! உனது பாதையில் செலவழிப்பவருக்குப் பதிலாகப் பல நன்மைகளை வழங்குவாயாக” என்றும், மற்றொருவர் “கஞ்சத்தனம் செய்பவருக்கு நஷ்டத்தை ஏற்படுத்துவாயாக” என்றும் பிரார்த்திக்கிறார்கள்.
பலவீனர்களைக் கவனித்தல் : சமூகத்தில் உள்ள ஏழைகள், நோயாளிகள் மற்றும் முதியவர்களைக் கவனிப்பது நம்முடைய ரிஸ்க் அதிகரிக்க மிக முக்கிய காரணமாகும். அவர்களுக்காக நாம் செய்யும் உதவிகள், நம் வாழ்வின் சோதனைகளை நீக்கி, இறைவனின் அருளைப் பெற்றுத் தரும்.
முடிவுரை:
செல்வம் என்பது நாம் சேர்த்து வைக்கும் குவியல்கள் அல்ல; மாறாக நாம் அனுபவிக்கும் மனநிறைவுதான். உழைப்பு என்பது அவசியமானது, ஆனால் அது மற்றவர்களுக்கு உதவும் நோக்கோடும், இறைவனின் கட்டளைக்கு உட்பட்டும் அமையும்போதுதான் அது உண்மையான பரக்கத்தாக மாறும். அல்லாஹ் நமக்குத் தந்ததைக் கொண்டு திருப்தி அடைவோம், பிறருக்குக் கொடுத்து மகிழ்வோம்.
 திறவுகோல்கள்){kind=link}
