අන් අයගේ අයිතිවාසිකම් පැහැර ගැනීම මහත් පාපයකි
අබූ උමාමා (රළි) තුමා අල්ලාහ්ගේ දූතයාණන් ﷺ මෙසේ පැවසූ බව වාර්තා කරයි.
“කෙනෙකු බොරු දිවුරීමක් මඟින් මුස්ලිම්වරයෙකුගේ අයිතියක් අසාධාරණ ලෙස පැහැර ගන්නේ නම්, අල්ලාහ් ඔහුට නිරය අනිවාර්ය කරයි. ස්වර්ගය ඔහුට තහනම් කරයි.”
එවිට එක් අයෙකු නබි ﷺ තුමාගෙන් මෙසේ විමසීය.”අල්ලාහ්ගේ දූතයාණෙනි! එය ඉතා සුළු වටිනාකමක් ඇති දෙයක් වුවද එසේද?”
නබි ﷺ තුමා මෙසේ පිළිතුරු දුන්හ. “ඔව්. එය අරාක් ගසක කුඩා කෝටුවක් පමණක් වුවද එසේමය.” (සහීහ් මුස්ලිම්)
ඉස්ලාම් ධර්මය මිනිසුන්ගේ අයිතිවාසිකම් ආරක්ෂා කිරීම පිළිබඳ ඉතා විශාල වැදගත්කමක් ලබා දෙයි. බොරු දිවුරුම්, බලය අයුතු ලෙස භාවිතා කිරීම හෝ වෙනත් ඕනෑම අසාධාරණ ක්රමයකින් අන් අයගේ අයිතිවාසිකම් පැහැර ගැනීම මහත් පාපයකි. පැහැර ගත් දේ ඉතා සුළු වටිනාකමක් ඇති දෙයක් වුවද, ඒ පිළිබඳ අනතුරු ඇඟවීම ඉතා දැඩිය.
එබැවින් සෑම මුස්ලිම්වරයෙකුම අන් අයගේ අයිතිවාසිකම් සම්බන්ධයෙන් ඉතා සැලකිලිමත් විය යුතුය. යමෙකු අන් අයගේ අයිතියක් උල්ලංඝනය කර ඇත්නම්, ඔහු අවංක තව්බාවකින් අල්ලාහ් වෙත හැරී, එම අයිතිය එහි නියම හිමිකරුට නැවත ලබා දිය යුතුය. මිනිසුන්ගේ අයිතිවාසිකම් සම්බන්ධයෙන් මෙතරම් දැඩි අවවාදයක් තිබේ නම්, අල්ලාහ්ගේ අයිතිවාසිකම් නොසලකා හැරීමේ භයානකත්වය ඊටත් වඩා වැඩි බව අප සැම විටම මතක තබා ගත යුතුය.
අල්ලාහ්ගේ මැවීම්වලට කරුණාව දක්වන්න
මිනිසෙකු අල්ලාහ්ගේ මැවීම් කෙරෙහි කොතරම් කරුණාවන්තව හැසිරෙන්නේද, අල්ලාහ්ද ඔහු කෙරෙහි එතරම්ම කරුණාව පෙන්වනු ඇත. මන්ද, විපාකය ලැබෙන්නේ කෙනෙකුගේ ක්රියාවන්ට අනුවය.
එබැවින් අපි සියලු මිනිසුන්ට ආදරය හා කරුණාව දැක්විය යුතුය. ඔවුන්ගේ යහපත ප්රාර්ථනා කළ යුතුය. ජාතිය, වර්ගය, භාෂාව හෝ වෙනත් කිසිදු වෙනසක් මත මිනිසුන් වෙන් නොකළ යුතුය. සෑම කෙනෙකුම මනුෂ්යයෙකු ලෙසම දැකිය යුතුය. වෛරය, වංචාව, ඊර්ෂ්යාව, පළිගැනීමේ සිත, තනතුරු ලෝභය සහ දැඩි සිත වැනි නපුරු ගුණාංග අපගේ හදවත තුළ වර්ධනය වීමට ඉඩ නොදිය යුතුය. මෙවැනි දැඩි හදවත් ඇති පුද්ගලයන් අන් අයට හානි සිදු කරයි.
අල්ලාහ් අතිශය ආදරණීය හා අතිශය කරුණාබරය. ඔහු ආදරය සහ කරුණාවට ප්රිය කරයි.
ඉතිහාසයේ අරාබිවරුන් පෙන්වූ ආගමික සහජීවනය
ක්රි.ව. 647 සිට 657 දක්වා නැගෙනහිර ක්රිස්තියානි සභාවේ උසස් පූජක පදවිය දැරූ තුන්වන ඉෂෝ යාහ්බ් මෙසේ සඳහන් කර ඇත.
“දෙවියන් වහන්සේ ලෝකයේ පාලනය ලබා දී ඇති අරාබිවරුන් අප සමඟ කෙසේ හැසිරෙන්නේද යන්න ඔබ හොඳින් දන්නවා. ඔවුන් ක්රිස්තියානි ආගමට සතුරන් නොවේ. ඔවුන් අපගේ ආගම අගය කරති. අපගේ ශුද්ධවන්තයන්ටත් පූජකයන්ටත් ගෞරව කරති. එමෙන්ම අපගේ දේවස්ථාන හා ආරාමවලටද උපකාර කරති.”
සදකා
නබිතුමා ﷺ මෙසේ පැවසූහ: “අල්ලාහ්ගේ සෙවණැල්ල හැර වෙනත් කිසිදු සෙවණැල්ලක් නොමැති කියාමත් දිනයේදී (මහ්ෂර් පිටියේ), පුද්ගලයින් හත් දෙනෙකුට අල්ලාහ් සිය සෙවණැල්ල ලබා දෙන්නේය.” ඔවුන් අතරින් එක් අයෙකු වන්නේ, “තම දකුණු අත දෙන දේ වම් අතට පවා නොදැනෙන තරමට ඉතා රහසිගතව දන් දුන් (සදකා කළ) මිනිසාය.”
